Plutôt que de dire, comme on le pense souvent : « le patois du village voisin est différent du nôtre, il est difficile à comprendre », nous apprenons à écouter ce qui fait les ressemblances, et souvent, le miracle opère : non seulement nous comprenons tout le monde, mais nous avons le sentiment que des patois éloignés par la distance, en Savoie, en Italie, en Suisse, ne sont pas si différents des nôtres. Et de plus, c’est sympathique de se représenter les choses ainsi !

Demandez à ceux qui sont allés aux fêtes du patois à Ceres (Piémont) en 2000, à Saignelégier (Jura Suisse) en 2001, à Brusson (Vallées d’Aoste) en 2002, à Cruseilles (Savoie) en 2003 et à Ceresole Reale (Piémont) en 2004. Et pour bientôt peut-être, nontra féta dou patoué dans les Monts du Lyonnais ?

Ou tribunal

Conte recueilli par Rémi Cuisinier

Lo non de la vigni

Lo plu soven, à la campagni, chôqua tarra é apelô d’en non spécial, celo dou métro, de la famiyi que la travaye depué lou sieclo passô. Den d’ôtro cô, lo non é tiri d’in élémen de la natura, rochi, ébro ou reviri. Mè o n’y a qu’an en non etranjo, come en sobrique qu’o ne compren pô bien ce qu’a vou dére, ou qu’o ne sa pô d’on qu’a ven. Comme tyen, j’è entendu parlô d’ina vigni en Bôjolè, mè la méma apelassion é conoua éto à d’ôtroz indre, den lo Languedoc, le Coute dou Rôno ou lo Bordelè. Vetya ce qu’i m’an racontô, den çu yô payi, ou nor de Liyon.

Denz en vilajo entre la Sôna et l’Azargue vivian o y a mé d’en sieclo in omo et sa fena, lo Piarro et l’Antonieta, que to lo mondo apelôve Piarro et Toaneta. Lo mé biô de you bien étye na vigni qu’i soagnôvon côsi tou lou jor, pa la piassi, la pouô dou ten de l’ivar, pué l'ebarbô ina vè que l'aye deborrô, lo prenten venu. Cela fena, la Toaneta, étye fran saji, l’allôve à la messa chôque diménye, et soven l’entrôve den l’elizi la semana pa betô de jôye fleur devan la statue de Sant Antoano de Padoue. Et le n’en profitôve pa se confessô à monsu lo Curô, en viy omo que conduye son tropiô d’ôme depué na trentena d’an, et la Toaneta èmôve bien bajaflô avoé yèlo, pace que le n’aye pô bien de chouse à avouô.

Mè vetya que to pa en cou, a devené malado et a modé à l’opitô, et a n’en revené pô, car al étye fran viu et a muré d’abôr bientou. Et quôque semane apré, l’evèquo envoyé in ôtro prétro, en jouéno que venye justo de sôtre dou seminèro, car la parochi étye pitita.

Nontra Toaneta, que ne poye parlô qu’à Sant Antoano, et prayi mè pô barbelô, fu ereuza de poché se confessô de noviô. L’alé trovô lo noviô prétro, en ayan en pou pou que’a ne savèse pô fran bien parlô la lenga de payi, çu jouéno, car l’èmôve mi son patoé que lo francè pa se confessô et pa bajaflô à son benèze et parlô de le chouse dou payi¹.

Quan le fu confessô, le sorté de l’elizi avoé l’absolussion et ina pitita frasi que le ne comprenye pô bien : al y aye dé, avan de modô, « alô et ne pechi plu » ; mè la Toaneta, que n’aye pô l’abituda de tyen, aye comprè : « alô et ne pissi plu » ! Ne plu fére chère d’éga, o n’étye pô fassilo à crère, mè o falôve zou fére pa avè l’absolussion ! Sinon...

L’aye bien de mô lo sè et raconté tot à son omo, mè le fesé to ce qu’o fallôve fére. Lo lendeman maden, le n’en poye plu et le borlôve tan que dure dure, de sôrta que lo Piarro y dizé : dou ten que te travayiré den nontra vigni, j’érè lo trovô, çu curô, pa savè ce qu’a vou comme tyen. Et bien sur, lo Piarro vayé lo curô, a s’espliqué avoé yèlo, et rassurô, a remodé en coran tiran sa vigni on que sa fena travayôve en sofran. D’abôr qu’a la vayé, penchia entre due renche, a y crié ôsi fôr qu’a poye : « Pissi, viyi ! Pissi, viyi ! » Et la Toaneta, que profitôve de sa culota fendoua si comoda, ecarté le chambe et se solagé d’abôr, pué, en sorian : « O granmeci, mon Piarro, granmeci ! »

Jugnan, den in ôtra vigni, bien penchi èto, dou vuzen travayôvon sen se fére vère. Et o y é yèlo que racontéron tota cel istoare à la prochèna veya, i ne poyan pô se quézi, et l’afére fi d’abôr lo tor dou payi, de sôrta que cela tarra, lou gen l’apelon depué çu ten « Pissi viyi ».

O n’y a d’ôtro que vo déran de vè que lo gen de vorendrè se trompon quan i dion tyen, et qu’o fô comprendre « Pissi vigni », car o s’agire solamen de vigneron que ne pouôvon pô pro you vigni pa avè mé de rèsen et comme tyen mé de ven, de môvè ven bien sur ! Mè o n’é pô possiblo, pace que parsona n’a jamè travayi comme tyen perityi : den lo Bordelè petêtre, o sa qu’i n’arrivon pô à vendre you ven vué, mè den lo Bôjolè, non, jamè !

Traduccion d’en contio limouzen de Paul Raynal en francoprovençal d’Izeron (Rôno)

¹Lou patoué dou vilajo bôjolè apartenon ou dialecto francoprovençal, que se pôrle den lo Forè, lo Payi Liyonè, la Brèssi, le Dombe, la Savoué, en morciô de la Franche-Comté et dou Dôfinô, de mémo que la Suissi Romanda, la Vallé d’Aosta et quôquez ôtre valé piémontèze. Cela lenga, fran vivanta den quôquez endre, se reveye en pou parto depué na ventena d’an, et mémo vué den lou Mon dou Liyonè.