Bien lo bonjor à tou ! Je vè vouo parlâ in quoque mouots de su Festival Francoprovinçal que sartins an vécu lou vïntetrè et vïntequatro setimbro dou mila sè à Cogne, din lo Val d’Aoste, vé louz Italiens.

A pou pré coma l’an passâ, j’étchions ina cinquanteuna à mouodâ din su jouilli paï. A pa quien, o vé biau coma peuizages ! Pa qu’eulo qu’ame la montagne, depu que je von à su Festival, je son sarvis ! A Cruzeuille in dou mila trè vé lou Savoyâ, à Ceresole in dou mila quatro vé louz Italiens, j’étchon ou pi dou Paradji, coma c’t’an, mé de l’outro lâ. Mé je n’ons pâ vu San Piarro ! O faut djire qu’i y ayeu le gnôles et al étche suramin cachi darri.

L’an passâ éto, à Martchigny vé lo Suisses, j’étchon ou pi de le jouilles montagnes.

O y ayeu don ïn pou de gnôles, mé o n’a pâ moyi, et to lo mondo étche contin et pa causa : j’on étâ reçu coma de rè à minjou. C’t’an, je n’on pâ eu la peuna de trénâ noutra muzeuta. O y ayeu à minji et à bère a se n’in fére petâ la piau dou vintro !

Je son sortu de trâbla tchiant quatre hue et du coup, o n’y a eu guée de mondo pa lo colloque ! Sartins, comame, an preufeuâ visitâ la villa, allâ vère lou denteyires, et to et to !...

Lo devesè, apré lo sopâ, je son allâ din in’outra sâlla pa donnâ noutre prestations avoué louz autres groupes qu’étchan vegni à la féta. O s’é pâ mâ passâ. Mé qu’à Martchigny. Si j’on rechantâ la Toinette, la Yoyette et Tropiau, c’t’an, je l’on mimâ. O vé mé que de demouoâ plantâ coma de piqueu ! Le gins compreunon mé. O fa plus vivant !

Si l’an passâ, j’étchin din in’abri antinucléaire pa couchi, c’t’an, châquion étche à l’hôtel, din ïn pitchi bor jugnant Cogne.

Lo lindeman, lo chauffeu noz ayeu dji d’étre préto vé nouv’oueue, mé din su paï, i ne sont pâ à in’ua pré ! O fazeu pâ chaud avoué le gnôles ! Je no son donc acuchi din ina matroua « bareuta », guée mé plus grand ! Que châquion se crampouona com’ a pouoa ! Lo chauffeu aye suamin l’abituda, pa qu’a mouodaye vintro à tarra lo vallin ! Le rotes viricoton à tou lâ !

Je son arrivâ ïn pou in retâ à la meussa, et o y ayeu mé de gins defou que din l’eglézi. J’on defilâ din la campagni avoué lou 39 groupes preuzin. O manquâye la miaula pa noz acompagni in chantant ! Lo pouo Glaudo ayeu biau s’égozilli avoué son pipiau et son harmonica, je l’intindyon pâ ! A fôrci de soflâ, al étche fran inronchi, su pouo djâblo !

L’an que vient, vé la vila, pa lo hué et nou setimbro, je deuvon n’ayi pluzieu miaules. Coma quien, lo Glaudo ne s’inronchaa pâ !

Din lo chapiteau, j’étchon mila dou cent à minji. Mé avant, lez ules noz an fa lo pitchi discor ! Je n’an guée comprè : lo micro : in-invention que mârche quâzi jamé ! O vé lo progrès !? O y ayeu ïn jouilli spectaclo que j’on avizâ in fignessant de mingi.

Sartins son mouodâ pa vère de vache que se borfon à coups de côrnes : Mé je n’amo pâ quien ! O n’y a que pardon ina côrna quôquevè. On’é pâ le bétche que vouolon se borfâ, o vé le gins que le fan se borfâ. O vé ïn pou coma la garra !

Tot-a ina fïn ! O faut songi ou retor. Damajo ! I chanton si bien, celou brâvo Italiens, et lo Suisse èto, et tou louz autro bien su ! Je ne lâsso pâ dou spectacle ! Je djon à tou : à l’an que vin vé chi-no, vé la vila ! Vegni vère noutron biau paï dou Liyonneu. Je pinson que je von ayi ïn bon cuchon de mondo pa fée la féta.

Jusqu’à mé ! Et fetchi vouo conutre pa donâ ïn coup de man. O y a de travar pa tou !

Portâ-vouo bien. Menagi-vo !

O yéte dou tun que lo diablo été païsan su la terra. A l’éte vasin avoué saint Michel. Yos prôs et yos terres se juignant.

C’était au temps où le diable était paysan sur terre. Il était voisin de saint Michel. Leurs prés et leurs terres se touchaient.

Le diablo qu’éte cosin avoué lou sept péchés capitaux, éte enviu fenayant et malin comme ina barotô de toîmes. Comme a l’éte fenayant sa grangi éte toujors vouédi et a ne faze pô rundre à se terres lo quore de ce que le poyun rendre.

Le diable, qui était cousin des sept péchés capitaux, était un vieux fainéant et malin comme une brouettée de topinambours. Comme il était fainéant, sa grange était toujours vide et il ne faisait pas rendre à ses terres le quart de ce qu’elles pouvaient rendre.

Son vasin aye toujors de recortes a s’y beto a genu devun, ce que runde lo diable jaloux.

Son voisin avait toujours des récoltes à se mettre à genoux devant, ce qui rendait le diable jaloux.

Saint Michel faze ce qu’a vole de sous das. Lo diablo n’aye ni los ni manilles pe tené sous utils et a demundé à son vasin de lou chungi avoué lous sins.

Saint Michel faisait ce qu’il voulait de ses doigts. Le diable n’avait ni poignées ni manches pour tenir ses outils et il demanda à son voisin de les échanger avec les siens.

- Lous mauvés ouvris ont toujors de mauvés utils, dise saint Michel en riant dans sa borba, mé a contuntove lo diablo que n’éte pos mé avanci après qu’avant.

- Les mauvais ouvriers ont toujours de mauvais outils, disait saint Michel en riant dans sa barbe, mais il contentait le diable, qui n’était pas plus avancé après qu’avant.

Saint Michel éte farceur et a l’éte contunt de fère de niches à son vasin.

Saint Michel était farceur et il était content de faire des niches à son voisin.

Un jor que lo diable trovove que la terra éte trop bôssa, a proposé à saint Michel de fère un marchi.

Un jour que le diable trouvait que la terre était trop basse, il proposa à saint Michel de conclure un marché.

- Si te vous travailli me terres je farun la recorta a mâtia.

- Si tu veux travailler mes terres, nous partagerons la récolte.

- Je volo bien reponé saint Michel ; mé que prundré-tu ce que sera dun la terra ou ce que sera dessus la terra ?

- Je veux bien, répondit saint Michel, mais que prendras-tu ? Ce qui sera dans la terre, ou ce qui sera au-dessus de la terre ?

- Ce que sera dun la terra.

- Ce qui sera dans la terre.

Quôque mâ après lo diablo vé qu’a s’éte beto lous das dun lou zis, son vasin n’aye seno, que de blos, de choux, de corles et bien d’autres chouses que ne poussont que dessus.

Quelques mois après, le diable vit qu’il s’était fourré le doigt dans l’œil : son voisin n’avait semé que du blé, des choux, des courges et bien d’autres choses qui ne poussent qu’au-dessus.

- Te no po de chunci ceté coup, qui disé saint Michel, mé lun que vint, si te voux prun ce que vindra su la terra.

- Tu n’as pas de chance, cette fois, dit saint Michel, mais l’an prochain, si tu veux, prends ce qui viendra sur la terre.

La sason d’après, le terres ayun ina jollia recorta, mé o yéte de truffes, de raves, de carottes… Lo diablo éte encore roulo.

L’été suivant, les terres avaient une jolie récolte, mais c’étaient des pommes de terre, des raves, des carottes… Le diable était encore roulé.

- Acota qu’a fé à saint Michel, o faut n’un finé ; o faut qu’o ni aille yun que fasse placi à l’autro, je ne poyo plus te sintre !...

- Ecoute donc, fit-il à saint Michel, il faut en finir ; il faut que l’un de nous fasse place à l’autre, je ne peux plus te sentir !...

- Et mâ je t’â assez vu, réponé saint Michel.

- Et moi, je t’ai assez vu, répondit saint Michel.

- Je vuns no battre !...

- Nous allons nous battre !...

- Je volo bien, mé afin que presonna ne venun no derunji, j’érun no cachi dans un forre.

- Je veux bien, mais afin que personne ne vienne nous déranger, nous irons nous cacher dans un fourré.

Lo diablo aye prât un grun bôton.

Le diable avait pris un grand bâton.

- Avoué tien, je soué sur de l’avâ.

- Avec ça, je suis sûr de l’avoir.

Saint Michel, lué, n’aye qu’un pitit fôtou, mé solido, ina vra billi d’ina charro de fin.

Saint Michel, lui, n’avait qu’un petit gourdin, mais solide comme la bille d’une charretée de foin.

Et y l’untryon dans lo forre et la batailli commencé.

Et ils pénétrèrent dans le fourré et la bataille commença.

Lo diablo n’éte po encore ou quorro de se pânnes ; à ne poye po viri son grun bôton dans lo forre qu’éte un pou bôt, tundis qu’avoué lo sin, saint Michel y cassove le coûtes à tor de brais…

Le diable n’était pas encore au quart de ses peines, il ne pouvait pas tourner son grand bâton dans le fourré qui était un peu bas, tandis qu’avec le sien, saint Michel lui cassait les côtes à tour de bras…

Et vatia comme saint Michel envoyé lo diablo dans lo payé de lous darbons aviso bousso lous gromuns pe la racina.

Et voilà comment saint Michel envoya le diable au pays des taupes regarder pousser les chiendents par la racine.